पिंपरी-चिंचवड महानगरपालिकेत ठेकेदारी पद्धतीने काम करणाऱ्या अनुसूचित जाती/जमातीच्या सफाई कामगार महिलांनी, महाराष्ट्र शासनाच्या अनुसूचित जाती/जमाती कल्याण समितीसमोर आपल्या व्यथा मांडल्यानंतर, त्यांना ‘प्रियंका एंटरप्राइजेस’ या ठेकेदार संस्थेकडून बदली करण्याच्या आणि कामावरून काढून टाकण्याच्या धमक्या दिल्या जात असल्याचा धक्कादायक प्रकार उघडकीस आला आहे. कष्टकरी कामगार पंचायतीचे अध्यक्ष डॉ. बाबा कांबळे यांनी या प्रकाराचा तीव्र निषेध केला असून, हे प्रकरण कामगार कायद्यांचे आणि अनुसूचित जाती/जमाती (अत्याचार प्रतिबंधक) कायद्याचे सरळसरळ उल्लंघन असल्याचे म्हटले आहे. संबंधित ठेकेदार संस्थेवर तात्काळ कठोर कारवाई करण्याची मागणी त्यांनी केली आहे.

पिंपरी-चिंचवड महानगरपालिकेत ‘प्रियंका एंटरप्राइजेस’ व ईतर ६ ठेकेदार संस्थेमार्फत १६०० हून अधिक महिला पुरुष सफाई कर्मचारी म्हणून कार्यरत आहेत, यातील बहुसंख्य महिला अनुसूचित जाती/जमाती प्रवर्गातील आहेत. या महिलांना किमान वेतन, भविष्य निर्वाह निधी (PF), राज्य कामगार विमा (ESI), सुरक्षा साधने आणि शासकीय सुट्ट्या यांसारख्या मूलभूत हक्कांपासून वंचित ठेवले जात आहे.

या अन्यायाला वाचा फोडण्यासाठी, पीडित महिलांनी नुकत्याच झालेल्या महाराष्ट्र विधानमंडळाच्या अनुसूचित जाती/जमाती कल्याण समितीच्या बैठकीत (ज्यामध्ये समितीचे अध्यक्ष आमदार नारायण कुचे, आमदार अमित गोरखे यांच्यासह इतर सदस्य उपस्थित होते) धाव घेऊन आपल्या तक्रारी मांडल्या. समितीने महानगरपालिका प्रशासनाला यावर तातडीने कारवाई करण्याचे निर्देश दिले होते.

मात्र, समितीकडे तक्रार केल्याच्या दुसऱ्याच दिवशी, म्हणजेच आज (दि. २१ सप्टेंबर) रोजी, प्रियंका एंटरप्राइजेसच्या सुपरवायझर याने तक्रारदार महिलांना बोलावून धमकी दिली. “तुम्ही काल समितीच्या बैठकीत ज्या तक्रारी केल्या, त्यावेळी आमचे मालक तिथे हजर होते. त्यांनी तुमच्यावर तीव्र नाराजी व्यक्त केली असून, तुम्हाला तात्काळ कामावरून काढायला सांगितले आहे. सध्या मी तुमची दुसऱ्या ठिकाणी बदली करत आहे, पण यापुढे संस्थेविरोधात कुठेही तक्रार केल्यास तुम्हाला नोकरी गमवावी लागेल,” अशा शब्दात या महिलांना धमकावण्यात आले. तक्रार केल्यामुळे सूडबुद्धीने बदली करणे आणि नोकरीवरून काढण्याची धमकी देणे, हे कामगार शोषणाचे गंभीर उदाहरण असल्याचे डॉ. कांबळे यांनी म्हटले आहे.