पुणे: जिल्हाधिकारी तथा जिल्हा निवडणूक निर्णय अधिकारी डॉ. सुहास दिवसे यांनी शनिवारी (९ नोव्हेंबर) इंदापूर विधानसभा मतदारसंघातील नारायण रामदास हायस्कूल व ज्युनिअर कॉलेज आणि इंदापूर आर्टस्, सायन्स, कॉमर्स कॉलेज येथील मतदान केंद्रांना भेट देऊन सुविधेबाबत आढावा घेतला.
यावेळी निवडणूक निर्णय अधिकारी डॉ. कल्याण पांढरे, सहायक निवडणूक निर्णय अधिकारी जीवन बनसोडे, सुशील पवार, निवडणूक नायब तहसीलदार विजय घुगे, इंदापूर पोलीस ठाण्याचे पोलीस निरीक्षक सूर्यकांत कोकणे आदी उपस्थित होते.
यावेळी जिल्हाधिकारी डॉ. दिवसे यांनी सूचना दिल्या, सर्व मतदान केंद्रावर पिण्याचे पाणी, स्वच्छतागृह, दिव्यांग व ज्येष्ठ मतदारांसाठी व्हीलचेअर, बसण्यासाठी बाकडे, खुर्चा, आवश्यक तेथे सावलीसाठी मंडपव्यवस्था करण्यात यावी. मागणी केलेल्या दिव्यांग व ज्येष्ठ मतदारांना घरापासून मतदान केंद्रावर आणण्यासाठी आणि मतदानानंतर घरी सोडण्यासाठी वाहनाची व्यवस्था आदी सुविधा उपलब्ध करुन द्याव्यात, अशा सूचना त्यांनी दिल्या.
त्यांनी तहसील कार्यालय येथील टपाली मतदान कक्ष, ज्येष्ठ नागरिक, दिव्यांग व इटीपीबीएस मतदार कक्ष, शासकीय धान्य गोदाम कालठण रोड इंदापूर येथील ईव्हीएम स्ट्रॉंग रुमला भेट देऊन पाहणी केली व मतदान केंद्रावरील सुविधांबाबत सूचना दिल्या.